BA GRAP 1

Warna Kuli

Ada satu kali di tampa pendaftaran kerja, ada 3 orang m ba isi biodata...drang dp tanxa warna kuli,,, pertama dp tanxa orang minahasa... dia bilang kuning langsa,, kadua orang mongondow... dia bilang sawo matang......

napa ungke katu s bingo,,, ungke p pikiran nama buah buahan samua ini... ungke s lbeh gugup lantaran smo dp giliran... no ungke in dari sanger konk dp kuli sdiki glap...

pas depe operator tanxa.... ungke warna kuli???? konk ungke jawab "salak tagulandang"

Om Bule Meninggal

Alo pe om bule meninggal. Jadi tu keluarga-keluarga laeng yang dari negara luar datang semua. Kong, waktu di rumah duka, Alo dengar samua manangis ba bahasa Inggris.

Bule 1 : "Hikz,... why you die so fast... hikz hikz..."

Bule 2 : "Pleaase don't leave me..."

Bule 3 -9: "Hikz hikz hikz... we will miss you..."

Alo so ilang slak lantaran dia nintau toh mo cumu apa mar. Lantaran tu gengsi nemau kalah dang to, Alo ba bise kacili disei mayat...

Kong Alo bilang : "Happy birthday..."

Minta Pin BB

Alex: "Utu ngana pe pin BB brp ? Biar torang bole mo baku BBM-an."

Utu : "Ini catat jo 17AUG45, mantap to? Kalo ngana dang brapa... Alo??"

Alo : "Hhmm ini kita pe pin bb catat jo.. G30SPKI..!!"

Alo Belajar Bahasa Inggris

Alo belajar bahasa Inggris.

Ibu Guru: "Ibu saya?"
Alo: "My mother..."
Ibu Guru: "Ayah saya?"
Alo: "My father..."
Ibu Guru: "Temen saya?"
Alo: "My friend..."
Ibu Guru: "Aww suda ada kemajuan ngana Alo? hmmm... kalu 'pacar saya' dang?"
Alo: "My tua..."

Judul Film Manado Asli

Judul Film Manado Asli:

The last samurai: Peda terakhir
I Am Legend: Makang puji
Night at the Museum: Malam-malam di muka SMP 1
The World is not Enough: Kase hati mau jantong
Hantu Jeruk Purut: Setang ini bukang daong lemong
A time travelers wife: Bini pang ba pontar
The Terminal: Tomohon, tondano, somo brangkat!!
My Wife Is A Gangster: Bini bajingan
Putri yang ditukar: Bidan nda ba taru kira
Cinta fitri: Nyanda abis-abis
Gone With The Wind: Konto Babadiam
Alien vs predator: Mambao lawan pa Sumanto
The Ghost Raider: Songko ba ojek
I Like it: Kita orang laikit
The Proposal: Ba Cari Dana
Bangku Kosong: Nda pi sekolah
Escape from alcatraz: So tumingkas dari malendeng
Drunken Master: Banyak di manado
Transformers: Trans Kawanua
Suami-suami takut istri: Bini Injang-injang
200 pounds beauty: Gaga tre mar gode
Million Dollar Baby: Babi harga kintal
Yes or no: Bilang jo, klo iyo, iyo, kalo nyanda, nyanda.
Mengejar Mas Mas: Ba bli eis cukur
Iron Man: Laki-laki sementara ba strika
X-Men First Class: Mantan cowo di klas 1 SMA
Beranak dalam kubur: Nda ada bidan
One miscall: Nda modal
A Big Fat Liar: Gode Pangbadusta
Hellboy: Laki-laki setang putar
Monster in law: Mama mantu le ka monster
Mamma Mia!: Mia pe mama
Armagedon: Bertobat jo, somo kiamat
The Lord of the Rings - The Return of the King: Raja babale ambe cincin ta tinggal
Harry Potter and half blood prince: Harry potter deng pangeran kurang darah
James bond: Jems pe utang
The vampire diaries: Catatan harian paniki sebelum jadi ikang
When in rome: Waktu makang kukis Roma
Shark 2: Cakalang Fufu
Prince of persia: Nyong-nyong Kampung Arab...

Punggu Dompet

Ungke batelpon ka radio Memora FM

Ungke: "Halo.. Memora FM? Ini kit ungke. Kita ada dapa dompet di jalang. Depe isi doi 4 juta, kartu kredit, voucher blanja hypermart, KTP, SIM, deng STNK atas nama Alo."

Petugas di Memora-FM:

"Oh kasiang ungke Bukang main do ngana pe jujur skali. Jadi ngana ba telepon supaya torang mo umumkan diradio, kong ngana mo kase pulang itu dompet, dang? So susah komang mo dapa org jujur rupa ngana jaman sekarang ini, ungke..."

Ungke : "Oh, nyanda.. Kita cuma mo minta putar akang lagu for Alo. Depe judul 'RELAKANLAH...!!'"

Bacarita Sedih

Alo, Utu, Ungke pasiar ke jakarta. Dorang 3 menginap di hotel JW Marriot, hotel beken di Jakarta. Dorang pe kamar di lantai 45. Siang-siang sampai malam mereka jalan-jalan ke mall, pas dorang pulang, sampe di lobby, tiba-tiba mati lampu.

Lift juga iko mati jadi dorang tiga musti nae tangga pi pa dorang pe kamar. Nah, supaya nda talalu barasa mo nae lantai 45, dorang berdiskusi kong berbagi tugas. Jadi dari lantai 1 sampai 15, Utu musti cerita grap-grap, kong lantai 16 sampai 30, Alo musti cerita setang-setang, kong dari lantai 31 sampai 45, Ungke yang se cerita sedih-sedih.

Jadi no dorang nae, Utu mulai cerita yang grap-grap beking dorang tatatawa sampe nda dapa rasa so dilantai 15. Lanjut Alo bacirita setang-setang, beking dorang tegang maar sampe no dorang di lantai 30. Biar kaki so bangka maar dorang so sanang karena so badekat pa dorang pe kamar. Kong Ungke pe giliran.

Ungke (dengan ekspresi sedih): "Sebenarnya dari tadi kita mo cerita maar tako nanti ngoni marah."
Utu: "Cerita jo capat somo lantai 40 ini..."
Ungke: "Jadi begini, itu kunci kamar ada tatinggal di oto di bawah."
Alo: "Adooo Ungkee, kiapa ngana nda bilang daritadi?"
Ungke: "Blum ta pe giliran ba carita..."

Pe Saudara di Provost Polda

Pas Alo lewat di pertigaan Citraland, Alo pe motor polisi swepeng. Alo so bingo yaki lantaran lupa bawa SIM deng STNK kong nda pake helm.

Polisi: "Selamat siang pak, mana SIM dan STNK?!!"
Alo: "Adoh, lupa bawa, komandan.."
Polisi: "Kalu bagitu ngana iko pa kita di pos, mo tilang pa ngna!"

Alo: "Adoh kasiang, tunggu dang qt mo telepon pa kita pe kakak di provost deng kita pe ade di Dirlantas POLDA."

Dengar Alo bilang bagitu, polisi jadi takage.
Polisi: "Ah, butul so dorang di Provost deng di Polda?"
Alo: "Iyo, napa kita kase nomor telepon kong telepon kalu nda percaya."

Polisi: "Ya sudah, untung ngana om ada sudara di Polda deng di Provost. Pigi jo om."

Alo pe pigi, polisi jd penasaran kong ba telepon di nomor Alo da kase.

Polisi: "Selamat siang, benar nomor ini di Provost Polda?"
Suara Telepon: "Benar, pak!"
Polisi: "Izin pak, kalu boleh tau, ini di bagian apa?"

Suara Telepon: "Ini di KANTIN, pak, laju jo bapak mo pesan apa?"

Polisi dalam hati : "oh ampuungggg, mo pesan, roti Biongooo ada?"

Tunggu Oto Lewat

Pagi-pagi itu alo yang umur 9 taon, kebetulan lagi libur skolah minta ijin pa mama

Alo : "ma kita mo pi bermaeng dulu pa ungke perumah....."

Mama : "eh alo..... ngana so sumokol?"

Alo : "sudah mama.....eleh papa pe nasi for dikobong ta so ambe akang sadiki...."

Mama : "ah ngana alo.., io pigi jo dang, mar kalo ba potong jalang tunggu oto lewat dulu baru ba potong neh?"

Alo : "beres mama... sapa pe anak kwa...."

10 menit kemudian tu alo so bale, kong manangis pe kancang

Mama : "kiapa ngana alo...?" (mama so nae darah)

: "dong ada cubit pa ngana?"

: "atau ada tumbu pangana?"

: "oh dong nentau pa mama?"

: "capat jawab kiapa ngana manangis?"

Alo : "bukang mama..."

Mama : "kong apa dang?"

Alo : "abis mama bilang tunggu oto lewat dulu baru kita potong jalang, kita tunggu-tunggu nyanda ada oto yang lewat...."

Mama:; x_x

Utu antar dpe oma ka dokter

Utu mo pi antar pa depe oma pi ka dokter nae motor.
Utu: Mari jo, Oma. klo ba bonceng, jang lupa ba pegang kuat neh..
Oma: iyo, ini so ba pegang kuat noh..
Utu: jang lupa ba pegang kuat neh, oma..
Utu kase inga ulang pa oma waktu motor somo bajalang..
..Oma: Iyo.. sudah so ba pegang.. cerewet skali ngana eh…
Utu: So butul2 so ba pegang kuat, Oma?
Kita so mo bajalang ini…
Utu langsung tancap gas. kong kage dapa dengar rupa ada barang jatung..
BRUAKKKKKKK!!
Utu kage kong haga ka blakang.. astaga.. ternyata oma so jatung dari motor…
Utu: Kiapa oma boleh jatung dang? Kita kan so bilang ba pegang kuat. Oma nyanda ba pegang so?
Oma: Sudah.. oma so ba pegang.. so ba pegang kuat-kuat le..!!
Utu: oma ba pegang dimana so?
Oma: Di pagar rumah…